Laudion, 2017ko martxoaren 31n. Laudioarron ondare kulturalaren zati handi bat Jose Arrue margolariaren margo lanei zor diogu. Nahiz eta belaunaldi berriek ezagun ez izan eta herriko kale baten izena dela bakarrik jakin, ezinbesteko jotzen dugu haren ekarpen kultura goraipatzea eta margolariaren bizitza hobeto ezagutzea.

Euskal tradizioak eta hein handi batean euskal kultura koloreztatu zuen Jose Arrueren heriotzaren 40. urtemugaren aitzakiaz, apirilaren 5ean, arratsaldeko 18:30etatik aurrera, hitzaldi irekia antolatuko da Kultura Etxeko Arraño aretoan. Felix Mugurutzak, Arrueren bizitza eta obrari errepasoa egiteaz gain, margoen garrantzi antropologikoa azpimarratzen saiatuko da. Horretarako, zer hobeagorik, hitzordu honetarako preseski antolatutako erakusketa txikia ikustea eta amaitzeko antolatutako gorazarreaz, musika eta guzti, gozatzea baino! Anima zaitezte eta hurbildu!